2026 жылы 24 қаңтарда «ECO-SOCIAL» қоғамдық бірлестігі мен «Қазақстан биоалуантүрлілікті сақтау ассоцияациясы» республикалық қоғамдық бірлестігі (АСБК) Қарақия-Қаракөл мемлекеттік табиғи (зоологиялық) қаумалының Қаракөл көлінде International Waterbird Census (IWC) – суда жүзетін және су маңайы құстарының 60-шы Халықаралық қысқы санақ жұмыстарын өткізді. Іс-шараға Ақтау қаласындағы Назарбаев Зияткерлік мектебінің «Эколидер» волонтерлік клубы мен «Қаракөл сақшылары» еріктілер жасағының белсенділері, «ECOJER» қауымдастығының Маңғыстау облысы бойынша аймақтық экологиялық кеңесінің төрағасы А.М.Қозыбақов және оның мүшелері, сондай-ақ Үстірт мемлекеттік табиғи қорығы директорының орынбасары Қ.Мамаев, ғылым, ақпарат және мониторинг бөлімінің аға ғылыми қызметкері С.Турмагамбетов, кіші ғылыми қызметкері Н.Жабас және кезекші мемлекеттік инспекторлар қатысты. Санақ барысында көл аумағында мекендейтін суда жүзетін және су маңайы құстарының саны мен түрлік құрамы анықталып, қаумалдың табиғи кешенінің сақталуына бағытталған шаралар жүзеге асырылды. Бұл іс-шара аймақтың биоалуантүрлілігін қорғау, халықаралық табиғат қорғау бастамаларын қолдау және экологиялық қауіпсіздікті қамтамасыз ету мақсатында ұйымдастырылды.
