Түлкі

Vulpes vulpes Түлкі – жыртқыштар отрядының иттер тұқымдасына жататын аң. Орташа дене бітімді. Денесі ұзын, аяқтары биік емес. Тұмсығы созылған, құлақтары үлкен, тік, үшкір. Құйрығы денесінің жартысынан ұзын және өте үлпілдек. Негізінен, түлкілер – түнгі жануарлар, яғни олар күндізге қарағанда түнде белсендірек болады. Олардың көру, иіс сезу және есту мүшелері өте жақсы дамыған. Түлкілер тамақ талғамайтын жануарларға жатады. Олар қояндар, тышқандар, құстар және жәндіктер секілді ұсақ жануарларды аулайды. Олар аңға жалғыз шығады, өздерінің құрбандарын аса қулықпен және төзіммен байқатпай аңду арқылы алады. Көптеген түлкілердің қорегі олардың өмір сүрген орталарына байланысты әр түрлі болып келеді. Қазақстанның барлық аймақтарында кездеседі.