Қазіргі заманда қауіпсіздік мәселесі алдыңғы қатарға шықты. Соның ішінде өрттің алдын алу – тек төтенше жағдайлар қызметінің ғана емес, бүкіл қоғамның ортақ міндеті. Өйткені өрт – көзге көрінбейтін қауіп емес, керісінше, көбіне адамның өз әрекетінен туындайтын апат.
Соңғы уақытта тұрмыстық өрттердің көбеюі алаңдатарлық жағдайға айналып отыр. Мамандар мұның басты себебі ретінде қауіпсіздік талаптарының сақталмауын атайды. Ескі электр желілері, артық жүктеме түсірілген құрылғылар, қараусыз қалған газ плиталары – барлығы да өрттің шығуына себеп болуы мүмкін. Бұған қоса, адамдардың салғырттығы мен «маған болмайды» деген көзқарасы жағдайды ушықтыра түседі.
Әсіресе қыс мезгілінде пеш жағу кезеңінде өрт қаупі күшейеді. Дұрыс орнатылмаған немесе уақтылы тексерілмеген жылыту жүйелері үлкен қатерге айналады. Ал жаз айларында табиғаттағы өрттер жиілейді. Құрғақ шөпке тасталған бір шоқ темекі немесе толық сөндірілмеген от тұтас орманды шарпуы мүмкін.
Өрттің алдын алу үшін ең алдымен тәртіп пен жауапкершілік қажет. Әрбір отбасы өз үйіндегі қауіпсіздік талаптарын қатаң сақтауы тиіс. Балаларға ерте жастан бастап оттың қауіпті екенін түсіндіру, төтенше жағдай кезінде қалай әрекет ету керектігін үйрету – маңызды қадамдардың бірі. Сонымен қатар, қоғамдық орындарда да қауіпсіздік ережелері сақталуы қажет.
Қоғамда өрт қауіпсіздігі мәдениетін қалыптастыру – ұзақ мерзімді, бірақ нәтижелі жол. Бұл бағытта ақпарат құралдарының рөлі зор. Халыққа түсіндіру жұмыстарын жүргізу, нақты мысалдар арқылы қауіптің салдарын көрсету – саналы көзқарас қалыптастырады.
Өрт қауіпсіздік инспекторы: Өрт қауіпсіздік инспекторы Е.Бердібеков
